Lev 25 | NdeIBE | STEP | UJehova wathi kuMosi entabeni iSinayi,

Leviticus 25

Umnyaka weSabatha

1 UJehova wathi kuMosi entabeni iSinayi,

2 “Khuluma ebantwini bako-Israyeli uthi kubo, ‘Lapho lingena elizweni engizalinika lona, ilizwe lona ngokwalo kumele ligcinele uJehova iSabatha. 3 Hlanyelani amasimu enu okweminyaka eyisithupha, kuthi kweminye iminyaka eyisithupha lithene amavini enu. 4 Kodwa ngomnyaka wesikhombisa ilizwe kalibe liSabatha lokuphumula, iSabatha likaJehova. Lingahlanyeli amasimu enu loba lithene izihlahla ezivinini zenu. 5 Lingavuni imkhukhuzela kumbe likhe izithelo zamavini angalungiselwanga, ilizwe libe lomnyaka wokuphumula.

6 Lokho okuzathelwa yilizwe ngomnyaka wesabatha kuzakuba yikudla kwenu, lokwezisebenzi zenu ezesilisa lezesifazana, lokwezisebenzi eziqatshiweyo kanye labemzini abahlala lani, 7 kanye lokwezifuyo zenu lezinyamazana zeganga elizweni lenu. Konke okuthelwa yilizwe kakudliwe.

Umnyaka weJubhili

8 “ ‘Balani amasabatha ayisikhombisa eminyaka – iminyaka eyisikhombisa iphindwe kasikhombisa – ukuze amasabatha eminyaka eyisikhombisa abe yisibanga seminyaka engamatshumi amane lesificamunye. 9 Lapho-ke akutshaywe uphondo ezindaweni zonke ngosuku lwetshumi lwenyanga yesikhombisa; kuthi ngosuku lokuBuyisana kutshaywe uphondo kulo lonke ilizwe lenu. 10 Umnyaka wamatshumi amahlanu wenzeni ube ngcwele, limemezele inkululeko elizweni lonke kubo bonke abahleli kulo. Uzakuba lijubhili kini. Lowo lalowo wenu kuzamele abuyele emzini wakwabo, kwabozalo kwakhe. 11 Umnyaka wamatshumi amahlanu uzakuba lijubhili kini. Lingahlanyeli lutho, njalo lingavuni imikhukhuzela kumbe likhe izithelo zamavini engalungiselelwanga. 12 Ngoba uliJubhili, uzakuba ngcwele kini; dlanini kuphela lokho elikuthethe emasimini.

13 “ ‘Ngalo umnyaka weJubhili umuntu wonke kuzamele abuyele emzini wakwabo.

14 “ ‘Uma uthengisela umuntu welizwe lakini isiqinti, kumbe usithenga kuye, lingaqilibezelani. 15 Uma uthenga emuntwini welizwe lakini kuzakuya ngokuthi mingaki iminyaka eseyadlulayo emva kweJubhili. Yena uzakuthengisela ngokuthi mingaki iminyaka esaseleyo yokuvuna amabele. 16 Nxa iminyaka iminengi uzakhweza intengo, kuthi uma iminyaka imilutshwana wehlise intengo, ngoba okuyikho akuthengisela khona linani lezivuno zamabele. 17 Lingaqilibezelani; kodwa mesabeni uNkulunkulu wenu. Yimi uJehova uNkulunkulu wenu.

18 “ ‘Gcinani izimiso zami, lilalele imithetho yami ngokunanzelela ukuze lihlale livikelekile elizweni. 19 Ilizwe lizathela izithelo zalo, lina lidle lisuthe lihlale kulo livikelekile. 20 Lingabuza lithi, “Pho sizakudlani ngomnyaka wesikhombisa uma singahlanyeli kumbe sivune amabele ethu na? 21 Mina ngizalilethela isibusiso ngomnyaka wesithupha, ilizwe lithele izithelo zeminyaka emithathu. 22 Lapho selilima ngomnyaka wesificamibili lizakuba lisidla amabele amadala, liqhubeke lisidla wona ukuze kufike isivuno somnyaka wesificamunye.

23 “ ‘Ilizwe akumelanga lithengiswe kuze kube nininini, ngoba ilizwe ngelami. Lani lingabezizweni labaqatshi kimi. 24 Kulo lonke ilizwe elingelenu lungiselani ukuthi wonke umhlaba owathengwayo uhlengwe.

25 “ ‘Uma omunye wakini esebe ngumyanga eseze ethengisa okunye kwempahla yakhe, isihlobo sakhe kasisize sihlenge lokho osekuthengiswe ngumuntu wakibo. 26 Kodwa-ke uma umuntu engelaye ongamhlengela khona, abesebuya enotha yena ngokwakhe azuze okwanele ukuthi azihlengele, 27 kabale imali elingana leminyaka leyo kusukela impahla leyo ithengisiwe, abuyisele imali esalayo kulowomuntu ayemthengisele, abesethatha impahla yakhe. 28 Kodwa-ke uma engelamali eyaneleyo yokuyibuyisa leyompahla ayithengisayo kayihlale kulowo owayithengayo kuze kufike umnyaka weJubhili. Izabuyiselwa kuye ngeJubhili, lapho-ke abe eseyithatha impahla yakhe.

29 “ ‘Uma umuntu ethengisa indlu edolobheni elihonqolozelwe ngomthangala ulelungelo lokuyihlenga emva komnyaka ithengisiwe. Phakathi kwalesosikhathi angayihlenga. 30 Uma ingahlengwanga kuze kuphele umnyaka ogcweleyo, indlu esedolobheni elihonqolozelwe ngomthangala izakuba ngeyalowo owayithengayo – ibe ngeyakhe kokuphela lowo owayithengayo kanye lezizukulwana zakhe. Kayiyikubuyiselwa kowayengumniniyo nge-Jubhili. 31 Kodwa izindlu ezisemizini engahonqolozelwanga zizabalwa njengeganga elingelalutho. Kazihlengwe, njalo kumele zibuyiselwe kubanikazi ngeJubhili.

32 “ ‘AmaLevi ahlezi elelungelo lokuhlenga izindlu zawo emadolobheni amaLevi, angawawo. 33 Ngakho-ke impahla yamaLevi iyahlengeka – lokhu kutsho indlu ethengiswe loba kukuliphi idolobho elingelabo – okumele ibuyiselwe ngeJubhili, ngoba izindlu ezisemadolobheni amaLevi ziyilifa lawo ebantwini labo-Israyeli. 34 Kodwa amadlelo angaphandle kwamadolobho awo akumelanga athengiswe ngoba ayilifa lawo kuze kube nininini.

35 “ ‘Uma omunye wabantu bakini esiba ngumyanga owehluleka ukuziphilisa phakathi kwenu, msizeni njengelingakwenza kowezizweni kumbe ohlezi lani okwesikhatshana, ukuze aqhubeke ehlala lani.

36 Akungabi lanzuzo eliyithatha kuye, kodwa mesabeni uNkulunkulu wenu, ukuze umuntu wakini aqhubeke ehlala lani. 37 Lingameboleki imali elenzalo kumbe limthengisele ukudla kulenzuzo. 38 Mina nginguJehova uNkulunkulu wenu owalikhupha elizweni laseGibhithe ukuba ngilinike ilizwe laseKhenani, ngibe nguNkulunkulu wenu.

39 “ ‘Uma omunye wakini esiba ngumyanga phakathi kwenu aze azithengise kuwe ungamsebenzisi njengesigqili. 40 Kaphathwe njengesisebenzi esiqatshiweyo kumbe umuntu ohlezi okwesikhatshana phakathi kwenu. Kakusebenzele kuze kufike umnyaka weJubhili.

41 Lapho-ke yena labantwabakhe bazakhululwa, abuyele kwabosendo lwakibo eziqintini zabokhokho bakhe. 42 Ngenxa yokuthi abako-Israyeli bayizinceku zami engazikhupha elizweni laseGibhithe, akumelanga bathengiswe njengezigqili. 43 Ungababusi ngochuku, kodwa wesabe uNkulunkulu wakho.

44 “ ‘Iziqgili zenu zesilisa lezesifazana zizavela ezizweni ezilihonqolezeleyo; kuzo yikho lapho elingathenga khona izigqili.

45 Lingathenga lezakhamizi ezihlezi phakathi kwenu okwesikhatshana, labomndeni wazo abazalelwa elizweni lenu. 46 Lingabenza babe yilifa labantwabenu, libenze babe yizigqili zabo okwanininini, kodwa akumelanga libuse ama-Israyeli akini ngochuku.

47 “ ‘Uma owezizweni, kumbe umuntu ohlezi phakathi kwenu okwesikhatshana enotha, kuthi owakini abe ngumyanga azithengise kowezizweni ohlala phakathi kwenu loba kolilunga lomndeni wezizweni, 48 ulokhu elalo ilungelo lokuhlengwa emva kokuzithengisa kwakhe. Omunye wezihlobo zakhe angamhlenga. 49 Umalumakhe kumbe umzawakhe, loba esinye isihlobo sakhe singamhlenga. Loba uma enotha, angazihlenga yena ngokwakhe. 50 Yena lomthengi wakhe kababale isikhathi kusukela ngomnyaka azithengisa ngawo kusiyafika emnyakeni weJubhili. Intengo yokukhululwa kwakhe izakuya mayelana lenani elinikwa umuntu oqatshiweyo okwalesosikhathi seminyaka.

51 Uma kusele iminyaka eminengi, kumele abhadalele ukuhlengwa kwakhe ngentengo eyingxenye enengi yentengo ayethengwe ngawo. 52 Uma sekusele iminyaka emilutshwana ukuba kufike umnyaka weJubhili, uzabala lokho akhuphe intengo yokuhlengwa kwakhe okulingana leyominyaka. 53 Uzabalwa njengomuntu oqatshiweyo kusukela komunye umnyaka kusiya komunye. Kumele libone ukuthi lowo owamthengayo kambusi ngochuku.

54 “ ‘Uma engahlengwanga ngenye yalezizindlela, yena labantwabakhe bazakhululwa ngomnyaka weJubhili, 55 ngoba abako-Israyeli ngabami, bayizinceku zami. Bayizinceku zami engazikhupha elizweni laseGibhithe. Mina nginguJehova uNkulunkulu wenu.